„Како си?“ започна од едно многу едноставно прашање. Прашање кое го поставуваме речиси секој ден, ама ретко застануваме навистина да го слушнеме одговорот.

Кога го почнав поткастот, идејата беше едноставна - сакав да седнам со различни луѓе и да разговарам за работи за кои можеби не зборуваме доволно. За менталното здравје, односите, спортот, работата, семејството, стравовите, успесите и неуспесите.

После повеќе од 100 разговори, мислам дека токму тоа сè уште ми е најинтересно кај „Како си?“. Никогаш не знам каде ќе нè однесе разговорот. Некогаш имам психолог пред мене, некогаш спортист, претприемач или музичар. А многу често најинтересниот дел од разговорот е нешто што воопшто не сме планирале да го отвориме. И можеби баш тоа сакам да остане „Како си?“ — место каде што можеме малку поискрено да зборуваме за тоа како навистина сме.